Shtyhet votimi i raportit të progresit për Maqedoninë e Veriut në PE

15:59 | 24 Maj 2023
A. B.

Komisioni për Punë të Jashtme i Parlamentit Evropian (AFET) ka shtyrë votimin e Raportit për progresin e Maqedonisë së Veriut nga raportuesi i PE për RMV-në, eurodeputeti bullgar Ilhan Kyuchuk, i përgatitur sipas raportit të Komisionit Evropian.

Raporti për Maqedoninë e Veriut ishte pika e pestë e seancës së sotme të AFET.

“Pika numër 5 duhet të ishte votim për Raportin për Maqedoninë e Veriut. Është shtyrë, prandaj nuk ka nevojë të diskutohet tani”, tha në seancë kryetari i Komisionit për Punë të Jashtme të Parlamentit Evropian, David McAllister.

Në Raportin e Progresit për RMV e raportuesit të PE-së, eurodeputetit bullgar Kyuchuk, të përgatitur pas raportit të KE-së, përshëndetet përkushtimi i vazhdueshëm i Maqedonisë së Veriut për integrim në Bashkimin Evropian, ndërsa bëhet thirrje për qetësi, dinjitet dhe pjekuri në marrëdhëniet dypalëshe.

Dokumentit, në të cilin viti 2030 përmendet si datë kur vendi duhet të plotësojë kushtet për anëtarësim në BE, i janë dorëzuar 320 amendamente, 50 prej të cilave janë të eurodeputetëve bullgarë, të cilat duhet të shqyrtohen nga anëtarët e Komisionit për Punë të Jashtme./Telegrafi/